Zu den bewährten Zielscheiben der Schnitzelbänkler gehört nicht nur Bundesrat Blocher. Auch der Rest aus dem Bundeshaus bekommt sein Fett ab, wie diese Kostproben zeigen:
Dä Zirkus um d Bundespresidänte-Wahl.
Das Gschyss wäge däm Ghaimdienscht-Skandal.
Als Basler Spatz grieg ych bald Würm.
Mi närvt im Bundesroot das Gschtürm.
Die kemme mir vor wie siibe Gleen,
wo dr ganz Daag numme Saich ableen.
Basler Spatze VSG
«Gib’s mir», «Nai, gib du», «bisch e Löli», «du Dumme»
Eso stritte sich dr Fritzli
und dr Hansli umme.
Nur d Mamme, die findet das gar nit witzig.
Die zwai spiile scho wiider «Bundesrootssitzig».
Luuszäpfe VSG
D Calmy-Rey blocht linggs verby und fliegt vom Trotti –
vo däre Rais isch das die ainzig gueti Fotti.
Die Penetrante CSB
Dr Couchepin sait: ych due saniere by dr Ah Ha Vau.
E ganz ney Gsetz, das han ych gmacht, es gilt fir Ma und Frau.
Ych muess das nur no duuresetze by Kollege und em Bundesgricht,
denn darfsch ab fuffzig by root iiber d Stross – iiber sächzig ischs denn Pflicht.
d Uffestuehler BSG
Dä fyni Staub, in dr Winterluft, dr kalte,
dä isch gfehrlig, vor allem fir die Alte.
Dr Merz dä fahrt dur’s Land, mit eme alte Diesel wo scho roschtet,
dass is d AHV nimm sovyl koschtet.
Dootebainli CSB
Ideen gibt auch ein Blick hinüber zu den nördlichen Nachbarn:
D Schwoobe entsorge mit vyl Gschigg
dr Schröder im Altershaim «zem Blick».
Jetz lyt y em Herr Ringier aa
und sag em: Sii mer hänn
au no e baar Settigi, wo mer nimme wänn.»
Peperoni CSB
Bi der Wahl vom Papscht lauft alles ganz nach Plan.
«Habemus papam» rieft me gly im Vatikan.
E weeni speeter kunnt denn s Echo us Berlin:
«Habemus Mamma, die erschti Bundeskanzlerin»
Gasladärne CSB
Im Schwobeland sin d Kirche voll
E Papscht us Bayern, das isch toll!
Zem Oobemool gits jetzt, do wett ich,
e Bier, e Brätzel und e Rettich.
Käller-Assle BB
Bevor är goht,benimmt sich dr Schröder
so saublöd, es goht kuum blöder.
Denn hett s ihn zum Blick uff Ziiri trybe
also do wär ych no lieber z Dytschland blybe
Alperöösli VSG
Mit den Amis ist das auch so eine Sache. Zu lesen gab es nicht nur diese beiden:
Amerika isch s Land vo unbegränzte Meegligkaite.
Drum losst dr Bush die Gfangene in ghaimi Lager laite.
Und wenn de mainsch, dass d Freyhaits-Statue dääne ihr Idol isch,
so muesch halt jetzt begryffe, dass die Dame inne hohl isch.
Schwoobekäfer CSB
Dass d CIA by uns duet lande
han ych vo Aafang a guet verstande.
Schliesslig isch doch d Schwyz neutral
und drum für das schlicht ideal.
Numme bym Start begryff auch ych denn nid:
Worum nämme die Black und Blond nid mit?
Dr Heiri CSB
Womit wir nun bei unserer Tour d’Horizont beim heikelsten Thema angelangt wären, das in der einen oder anderen Variante bei fast allen Schnitzelbänklern auftaucht. Drei exemplarische Beispiele dazu:
Frogsch mi, wieso singsch du jetzt do und zaigsch kai Helge.
Waisch, ych ha Schiss, s klappret s Gebiss wie luggi Felge.
Ych zeichne nyt und mool au nyt, y bi doch nit doof:
uff Karikature droht jetzt nämmlig Doodesstroof.
Dr Uffgweggt BB
S tuet is zwor weh in unsre Härze,
doch dä Helge mien mir schwärze.
Au wenn sii Pointe no so schetze:
Mir wänn kai Muselmaa verletze.
Buschdrummle CSB
Mir hänn us Ruggsichtnahm, das mechte mir bedoone,
by däm Helge do, verzichtet uff Persone
und hänn dr Abdrugg in de Zytigge verbotte –
es soll joo kaine uff d Idee koo, dass mir spotte!
Gasladärne CSB
