Dr Peterli isch am Sunntig zoobe mit Babbe und Mamme hinter dr Glygge härgloffe, wo sy greesseri Schweschter pfyfft. Derby sinn si wie alli andere au, wo bim Ladärnen-Ypfyffe hänn welle derby sy, pudelnass worde. Dr Peterli het de wunderheerlige Piccolorief gar nit rächt kenne zueloose, er isch mit syne Gedangge schon e baar Stund wyter gsi: Sott s uusgrächnet am Vieri, won är sy allererschti Fasnacht als Dambuur derf erlääbe, wie uus Kibel schitte? Dehaim im Bett isch er denn ganz druurig mit Dräänli uff de Baggen ygschloofe. Und do het er aafoo draume – draume vom ene stärneglare Himmel, dr Petrus het dr Dambuurmajor-Stägge in d Hand gnoo und ganz luut gruefe: «Morgestraich, vorwärts, marsch!»