Faasnachtsdangg 2008

E soon e Faasnacht, das isch Muusig!

Sy goot woorschyynlig jetz scho glyy

als beschte Joorgang vom Joorduusig

in jeedes Baasler Gschichtsbuech yy!

Bevoor mer Goschdym, Gummiduume

und d Helgeli vom Schnitzelbangg

und alli Instrumänt verruume

isch dr Momänt fir Loob und Dangg.

Dr Petrus wämmer bsunders loobe.

Er het is soon e Wätter gschänggt,

dass me verstoot, wie guet me doobe

an Baasel und an d Bebbi dänggt.

Doch, d Gnochenarbet, die blybt hängge

am Baasler Boode-Personaal.

Drum wämmer mit em Dang au dängge

an «Service Public/Ville de Bâle»:

D Kadette, d Fyyrweer, d Stroossebaaner,

d Allmändverwaltig, d Bolizey,

dr Rettigsdienscht und d Route-Blaaner

hänn drey Dääg Arbetszyt statt frey.

Eych alle gheert e Danggscheen-Maie

bevoor mer is wie ee und jee

uff d Faasnacht s näggscht Joor wider fraie.

……………d Frau Fasnacht und au s Comité