Wär dervo verzellt, er gieng go gässle oder an ains vo de Guggekonzärt, maint – laider – maischtens d Gässli uff dr Groossbasler Syte oder dr Seibi und dr Märtblatz. Wie wenn s in Glaibasel kai Fasnacht gäb . . . Derby waiss me jo lengscht, ass ganz groossi, draditionsrychi Glyggen uus em Glaibasel kemme – stellverdrättend fir anderi bispylswys die elteschti Glyggen iberhaupt, d VKB, oder d Olympia, wo das Johr ihre 100. fyrt. Und in Gugge-Grais isch s «Claramonschter» au scho lang e Begriff. Und ganz ney isch d Ladärne- und Requisite-Uusstellig nonemool uffgwärtet worde. Guet esoo. Villicht finde jetz ändlig no e bitz meh Fasnachts-«Konsumänte» der Wääg iber dr Bach.