Faasnachtsdangg 2005

In So ganz zivil fyylsch di zwoor noonig.

Aber ainewääg stellsch fescht:

Die Faasnacht Null-Fimf gheert zer Chronik

und isch alte Schnee vo gescht’.

Bevoor mer alles scheen verruume

wämmer aber, wie sich s gheert,

s grooss Danggscheen-Saage nit versuume.

Das hämmer dehaim soo gleert.

Zer rybigsloose Faasnachtsgstaltig

speyen alli fescht in d Händ

und d Iiberstunde sinn jo gwaltig

uff em Baudepartemänt.

Au ganzi Bolizischte-Gaarde,

d Kadette, d Fyyrweer, d Sanideet,

steen drey Dääg lang baraat zem staarte

wenn emol en Ungligg gscheet.

S hänn d Scheff vo Gugge und vo Wääge

aimol mee begaischteret

am Moorgestraich – es isch e Sääge –

was glyychtet het verglaischteret.

Dä Riisegrampf und s Ummehetze

rund um s Baasler Faasnachts-Fescht

isch kuum gnueg z rieme und gnueg z schetze.

Iir laischtet alli s allerbescht.

Mer wänn im Namme vo de Gugge,

Wääge, Drummler, Pfyffer, hit

Eych zimftig alli Pfoote drugge.

Ooni Eych giengts nämmlig nit!

Mer hoffe gäärn, Iir liebe Gselle,

iber s Joor (und ooni Schnee)

deerfe mer wider uff Eych zelle

Ganz häärzlig,

s Fasnachts-Comité