Drey Daag und Nächt gstramplet – und jetz stramplet er demorge frieh no uff sym Velo haim uff Rieche. Er gseht gspässig uus, dä Ueli. Er isch nämmlig dootmied, drampt unhaimlig schwär in d Pedaal und het nit emool meege d Larven abzieh. Es isch villicht au besser esoo, es goht em vyl dur dr Kopf, und s mien jo nit grad alli gseh, was en beweegt.

«Mer strample»: Mit däne zwai Werter – ganz im iberdraite Sinn vom Fasnachtsmotto – isch er in de letschte 72 Stund meh als em lieb gsi isch konfrontiert worde. Und niemerts vo däne, won er mit däne Werter automatisch in Verbindig brocht het, het im voruus au numme im Draum dra dänggt, ass s Motto vo dr Blaggedde uusgrächnet uff si däät zuedräffe.

Do isch emool dr Glygge-Kolleeg Fredi, wo syt iber 15 Johr gligglig (het er gmaint) verhyrootet isch, drey härzigi Kinder het und juscht vor dr Fasnacht – wägem en andere Glyggemitglid – Gnall uff Fall vo synere Frau verloo worden isch.

Denn dr Hans, wo au Famylie het, und zämme mit synere Frau scho syt mängge Johr vyl Graft und Muet uffbringt. Die baide hänn nämmlig e schwärgrangg Kind dehaim, wo allerdings e groosse Schritt vorwärts gmacht gha het und wo me drum berächtigti Hoffnige het derfe ha, ass es mit em ändlig e bitzli uffwärts gieng. Doch vor zwai Wuche het s Schiggsal wider zuegschlage. Dr Gsundhaitszuestand vom Glaine het sich bletzlig esoo verschlächteret, ass er sofort het miesse ins Spittel ygwise wärde. Sythär schwäbt er zwische Lääbe und Doot. Während de drey scheenschte Dääg het s Elterebaar jetz e bitz kenne vergässe – aber wie gseht s hitte demorge wider uus?

Währenddäm er wyter dief in Gedangge versungge haimgstramplet isch, isch em Ueli au d Silvia, sy frieheri Frindin in Sinn koo. Si pfyfft hitte in ere befrindete Glygge mit, wo em Ueli sy aigeni Glygge uus Dradition kurz vor em Ändstraich am Donnschtig drifft. Das isch au das Johr nit anderscht gsi. Wo dr Ueli mit dr Silvia bim Fischmärtbrunne aagstoosse het, isch em sofort uffgfalle, ass si irgend ebbis uff em Härz het. Zerscht het s em gar nyt welle sage: «Nai, Ueli, s isch nyt, es goht mer guet.» «Hesch scho schlächter glooge», het er gmaint, und denn het si sich nimm kenne zrugghalte. Esoo het dr Ueli erfahre, ass si kirzlig uff tragischi Wys ihri Eltere verlore het.

«Mer strample»? Dr Ueli mag s fascht nimm heere, und doch stramplet au är wie vyli dausig anderi scho jetz in Vorpaid em 22. Hornig 1999 entgeege…