Dr Pierrot, jo dä, wo jeedes Johr mit syne Dambuurekolleege am Donnschtig demorge sy ganz pärseenlige Ändstraich ruesst, sitzt kurz vor de Vieri gedanggeverlore uff dr Stääge. «Mer kemme uff d Wält!», um das Sujet umme sinn syni Gedangge jetz drey Dääg lang graist. Uff was fir e Wält? Uff aini, wo wägen Iberschwemmige in Moçambique Dausigi vo Lyt ihr Läbe hänn miess loo, Aberdausigi ihr Haim verlore hänn und uff dr Flucht sinn. Uff e Wält, wo in Tschetschenie dur dr langi Grieg unändlig vyl Laid iber unschuldigi Famylie koo isch. Uff e Wält, wo wäge Griegsverbrächer Aberdausigi vo Betroffene hänn miesse flichte, niene gärn gseh sinn und vor eme vellig ungwisse Schiggsal stehn. Uff e Wält au, wo bi uns in dr ryche Schwyz e mängge unschuldig arbetslos worden isch und fascht verzwyflet, will er nimm waiss, wien er syni Liebschte ka durebringeSNumme mit groosser Mieh glingts em Pierrot, die dunggle Gedangge in däm Augebligg z verschyche. Er isch froh, won er d Larve wider ka aaleege und dr Ändstraich drummle. S näggscht Johr denn, am 5. Merze, am Vieri demorge, kunnt er wider uff d Wält…