Bevor me ka usspiile, muess jo zerscht emool aine oder aini d Karte mischle und s Spiil gää. Das het das Johr dr Petrus, wo offebar mit dr Frau Fasnacht e Hoochzyt erläbt, hervorragend gmacht. Er het d Karte absolut grächt verdailt, das haisst, eb Glygge oder Gugge, eb Ainzelmasgge oder Wäägeler, alli hänn under de glyche fantastische Bedingige kenne (us)spiile. Und derby hänn vyli vo ihne wirgglig alli Trimpf usgspiilt. Esoo hämmer is derfe fraie iber fantasyvolli Vorträbler, iber glungeni Reggwysit, iber kinschtlerischi Superladärne, iber dr grooss Farberychtum bi de Goschdym vo de Pfyffer, Dambuure, Guggemusikante und au Wäägeler. Kurz: Die us-gspiilte Sujets hänn in vyle Fäll au gstoche. Jetz isch laider usgspiilt. S Spiildiktat ibernämme jetz wider anderi. Sottigi, wo mit verdeggte oder zinggte Karte spiile, alli Trimpf fir sich bhalte und ihren Untergääbene numme d Brättli zueschiebe. Esoo, ass die s Spiil mien verliere.

Doch blybt is ai Drooscht: D Frau Fasnacht losst sich vo niemertsem gängle oder dryreede und nimmt im 2009 – hoffetlig wider zämme mit em Petrus – vom 2. bis 4. Merze d Karte wider fescht in d Händ…