Der Zyschtig isch fir mi und gwis fir vyli dausig anderi, eb mit oder ohni Larve syt Johre der scheenschti Fasnachtsdaag. Dr Daag, wo Kind und Kegel, befreyt vo allene Fessle, nohn em aigene Go–t ka Fasnacht mache. Es isch wunderheerlig im Härz vo Basel däm bunte Drybe zuezluege.

Vo dr Freye Strooss här kunnt e ganzi Wuslede vo Kinder: Sottigi mit sälber zimmerete Reggwysyt, anderi draage stolz mit Wasserfarbe gmoolti Ladäärnli, wider anderi stolziere als Schyssdräggzigli mit zäh Affe im Vordraab, zwai Pfyffer und eme Dammbuur, wo fascht glainer isch, als sy Drummle, und nonemool anderi hänn im Mammi dr Kinderwaage gstybytzt und druus e Fasnachtswaage gmacht. Glychzytig schränze uus dr Huetgass 35 farbebrächtigi Blätzlibajass entgeege, vo der Falknerstrooss här kunnt e Riseharscht Dammbuure und Pfyffer, alli im heerlige Charivari.

Zmitts uff em Blatz stehn e baar Waggis-Wääge, wo d Binggis s erscht Mool in ihrer Fasnächtler-Karriere derfen uffestygen und d Kybytz uff em Blatz mit Räppli, Däfeli und andere gluschtige Sache «säägne». Ai Waage-Clique het Disch und Stiehl mitbrocht und macht bi däm Friehligs-Wätter grad die aigeni Freyluft-Baiz uff.

Am speetere Nohmidaag gohts zue wie im enen Imbi-Huus. Uus alle Gasse und Gässli streeme Glygge, Gugge, Schyssdräggzigli, groossi und glaini Wääge und härzigi Ainzelmäsggli uff der Blatz. Es git e haillos scheeni Wirlede uff em Märt stehn d Fasnächtler und d Zivilischte esoo dicht, ass me grad uff ihre Kepf kennt laufe. Mit aim Wort – alli gniesse das unorganisiert Durenander, frey vo Comité-Norme.

Laider, laider gits aber sottigi, wo nit wisse, mit däre Freyhait umzgoo. Ihne isch nit glar, dass es fählende Norme z drutz halt e baar ungschribeni Reegle git. Do derzue gheert ebbe, ass me Räppli nit vom Bode zämmegratzt, in e Plastiksagg stopft und denn em näggscht Beschte, wo grad am Ässen isch, hampflewys ins Muul wirft. E Guete!

A propos Räppli wärfe: Eeben esoo verwärflig isch, wenn s Zyl Masggierti sinn, wo verbylaufe. Wär schon emool under ere Larve gstäggt isch, waiss, wie schlächt aim dä Babyrstaub under dr Larve bikunnt. Und wenn mer scho bim Wärfe sinn: S isch au nit bsunders originell, verdätschti Orange, wo vo Wäägeler zyllos ins Publikum gschosse worde sinn, uffzlääse und grad wyter in d Menschemängi z wärfe. Do hänn heegschtens noh dr Fasnacht «chemischi Rainigunge» ihri Fraid dra…

E letscht Mischterli, wo aim d Fraid an dr Freyhait vergälle ka. Ass e Gugge fascht wien e «Spielmannszug» d Gärbergass derhärkunnt und die glatte Sieche kai Larve aahänn, ka aim jo no glych sy. Si wisse s halt nit besser. Ass z vorderscht d Paukischte laufe (das isch bi vyle Guggen esoo) und sich mit em Paukeschleegel dr Wääg bahne, ka me wohrschynts au nit ändere. Wenn aber denn en uffbloosene Gugge-Goggel mit sym Paukeschleegel s Gsicht vom ene dreijährige Knirps am Stroosserand drifft, dernoh isch d Gränze vo dr Freyhait aidyttig iberschritte.