Dr «Rädäbäng», dr Fasnachtsfiehrer, usegää vom Fasnachts-Comité, sott aigetlig all däne, wo am Stroosserand stehn und em Cortège zueluege, Uuskunft gää iber das, was d Glygge, Gugge, Wääge, Grubbe, Ainzelmassgge und Schääse dien uusspile. Me ka das Biechli als en Art Dienschtlaischtig am zyvyle Fasnächtler aaluege, e Dienschtlaischtig, won er derfir au sibe Stitzli aanelegt.

Alli Fasnachtsgrubbierige bikemme in däm Fiehrer Gläägehait, in e baar Wort – si derfe au graimt sy – ihr Sujet z ergläre. Scheen wär, d Lääserin und dr Lääser dääte derby druus koo, was aber nit allewyl dr Fall isch.

Wie wott me denn au druus koo, wenn zem Byspil d Wääge Cageot-Waggis, Gammler-Waggis, Ohmächtigi Brieder, Wäglitramper und d Dammbuure-Grubbe Galgeveegel d Frächhait hänn, iberhaupt kai Sujet aazgää?

Do muess sich dr Kaifer vom «Rädäbäng» jo bschisse vorkoo. E bitz villicht au, wenn er s Sujet vo – nomen est omen – dr Pfyffergrubbe Die Bschissene list, es haisst lapidar «25 Joor derbyy». Iberhaupt iberdräffe sich jeedes Johr mänggi «Ainhaite», won e runde Geburtsdag hänn, an Originalideet: D Altstadt-Schränzer maine «Mir jubiliere im neie Stammkostüm», d Crazy-Waggis hänn «5 Joor-Jubileeum» in «Rädäbäng» schrybe losse, und d Miggeli-Schränzer (10 Johr) und d Guggemuusig Quätschkommode (15 Johr) sage s no kirzer: «Mir jubiliere».

Au nit origineller, derfir eebefalls kurz, sinn d Sujet vo dr Pfyffergrubbe Kiechli («hänn Premiere») und dr Guggemuusig Nuggispugger Binggis («Mir fyyre Premiere»).

Do lob ich mir doch d Pfyffer- und Dammbuure-Grubbe Die Ainsame, wo s Sujet meegligerwys au uff si sälber gminzt isch: «Die hänn jo kai Idee»…

Ganz gwis isch das in ere Ainzelmassgge esoo gange, wo s im «Rädäbäng» derzue haisst: «Uuuiiie.»

Me ka s ibrigens kaim verdängge, wenn er versuecht z dichte und z raime: Numme mien sich d Guggemuusige Deenli-Spugger, Altstadt-Schränzer (scho wider si) und au d Gasse-Jätter sage losse, ass ihri Värs nit besser wärde, wenn s am Schluss haisst: «Orig.Värs vo…»

Dr Vogel vo dr Originalideet hänn aber zwyfellos d Itelpfad-Gnepf abgschosse, wo als Sujet gwählt hänn: «Z Basel isch Fasnacht».

Wenn y all die Sache due lääse, kan y numme – wie Die Zfridene im «Rädäbäng» – sage: «Nai, esoo nit.»