«Zämme in d Hoose!», e heerlig Sujet, wo während de drey scheenschte Dääg (und Nächt) vo aggtyve und passyve Fasnächtlerinnen und Fasnächtler voller Fraid uusgläbt worden isch.

Aagfange mit dr Frau Fasnacht, wo zämme mit em Petrus in d Hoosen isch und is vo droggener Kelti iber Nessi und stargge Wind bis zue de wermschte Sunnestrahle alles gschänggt het.

Zämme in d Hoose in dr Baiz sinn au dr Novartis-Diräggter und dr arbetslos Familievatter, wo s Opfer von ere Fusion worden isch.

Zämme in d Hoose sinn Politiggerinnen und Politigger vo links bis rächts, wo kirzlig im Wahlkampf no vehemänti Differänze gha hänn.

Zämme in d Hoose sinn Zircher Zöifter und Basler Gsellschaftsbrieder – bim Sujet vo de Basler Zepf Ziri.

Zämme in d Hoose sinn dr Drummelhund, d Pfyfferprimadonna, dr Gugge-Schränzer und dr Waage-Ruech und hänn e Schyssdrägg-Zigli bildet.

Zämme in d Hoose sinn die vyle freywillige Hälferinnen und Hälfer, wo behinderte Mitmensche in Rollstiehl an Cortège beglaitet hänn.

Zämme in d Hoose sinn – wenn au numme fir kurzi Zyt – s Baselbiet und Basel und do derby sogar d Wybli vo der 5.griene Rotte und d Männli vo de «gwehnlige» vierBanntagsrotte.

Zämme in de Hoose hänn der Abdul Safdar und der Moshe Levy in ere Gugge mitgschränzt.

Und schliesslig sinn – baidi in dr glyche Glygge – dr Balz Merian vom Bruederholz, Schieler in dr Mugge am Minschterplatz, und dr Yazgül Yildirim uus em diefschte Glaibasel, wo in s Bläsi in d Schuel goht, zämme in d Hoose.

Scheen wär s, grad die letschte Byspil dääten ändlig emool in den Ohre vom ene hertere Glaibasler Kopf schoelle, äxgysi, schälle…

In däm Sinn: Aadie Fasnacht und aadie zämme – bis am 2.Merze 1998!