Zue de drey groosse Blatzkonzärt uff em Seybi, Märtblatz und Gloreblatz streemen allewyl Dausigi vo Gugge-Frind. Doch scho vorhär git s beschti Gläägehait, all die Gugge bim ene Paraade-Marsch z gniesse. Si marschiere nämmlig uus Dradition vom «Exhibition Square», wie der Mässblatz hitte jo so scheen haisst, uff dr Route Glorestrooss, Gryffegass, Mittleri Brugg, Ysegass zem Märt, denn dur die Freyi Strooss bis zer Hauptboscht. Dert trenne sich denn d Wääg vo de FG-Gugge (Freyi Guggemuusige) und den IG-Gugge (Interessengemeinschaft fasnächtlicher Gugge-Musiken). D FG-Gugge schränze uff em Märt, d IG uff dr Bihni vom Seybi. D Guggemuusiger pflägen also erfrailigerwys underander Frindschafte – und das Johr isch dr Kolleegegrais sogar erwyteret worde. S erscht Mool sinn bi dr Paraade au e baar Gugge vom Glore-Monschter derbi gsi. Dr Marsch isch also daatsächlig under eme guete Stärn gstande – er haisst nit vergääbe Stärn-Marsch…