Von der ältesten (VSG) bis zur jüngsten Schnitzelbangg-Gesellschaft (Comité 2000) drängen sich inzwischen über 70 Formationen in die Beizen und vor allem auch vor die TV-Kameras. Darum hier eine kommentarlos und weitgehendst nach dem Zufallsprinzip bestimmte Auswahl. Sie beginnt mit Bänggen der Verainigty Schnitzelbangg Gsellschaft (VSG) und der Basler Schnitzelbangg Gsellschaft (BSG).

Die Pfanne vom Coop,
die sin gar nit ächt.

Die kömme us China
das sygi nit rächt.

Do mien mir nur lache,
dass d Lyt so blöd dien:
Was mainsch, wohär mir unsri Värsli beziehn?
Luuszäpfe/VSG

Alli Fuessgänger sotte,
wills jede duet schütze,
der Zebrastreife au wirgglig benütze.
Au Drämmler sotte’s wisse,
au das schützt Lääbe:

Wo e Glais isch gheerts Drämmli
uf d Schyyne und nit dernäbe.

Grienschnäbel/VSG

Radio Edelwyss haisst jetzt Basel one.
das syg e Partysänder mit e huffe Fun.
E bessere Name gits e kaine,
denn loose duet dä eh nur aine.

Superbebbi/VSG

Mir hänn nit welle druff verzichte
iiber d Swiss e Värsli z dichte.
Doch by dääne waisch verglemmi nit,
ob’s die am näggschte Daag no git.

Nachtschwärmer/VSG

Der Peter Sauber lüttet mir
gescht zoobe a:
«Liebe Schorsch,
ich bruuch no ganz e schnälle Maa.»
Ich ha ihm gsait:
«Ich kenn do ain,
dä könntisch nee,
är isch Ex-Drämmlifiehrer bi der BVB.»
Schorsch/BSG

Basel-Stadt und Baselland
laufe nimme Hand in Hand.
Wotsch uf Lieschtel,
Kheysch grad aabe
in e Läggerli-Reeschti-Graabe.

Schreggschruube/BSG

Dä Stomussfall z Amerika
Lueg ych mit andere Auge aa.
Ka nit verstoh, worum die munggle,

dä Busch hoggt doch scho lang
im Dunggle.
Dr Gluggsi/BSG

Trotz Flugstrytt hetts im Moritz glänggd
Är het de Schwoobe alles gschänggt.
Die maine logger:
«Dankschön Schnäuzle.
Dir gemmer s Bundesverdienstkräuzle.

Die Gsalzene/BSG

Die Gugge uss Oman,
die schigge mir hai.
Zem Schnabelpryys do sage mir Nai!
Mir sin dergege
wo s numme goht
so sitze mir schnäll im Bundesroot.

Die Haiggle/BSG

Der Pfarrer Kuenz vo Brunzeschwil
dä staggelet bim Singe zvyyl!
Ich wurd fir dä ai Job no gseh,
bim DRS als Wätterfee.

Romeo und Julia/Comité 2000

Noo finfezwanzig Jöhrli Strigge
hän mir is doch dänggt
mir wänn s näggscht Johr e Frau uffnäh wo d Männerquote sänggt!
In Froog käm do nur aini,
dorum hän mir grad derby
an d Sonia Nef dänggt, mit de Schyy,
die fädlet doch am beschten yy.

Striggede/Comité 2000

Wenns das Johr wiider frieh
sone Johrhundertsummer git,
denn liidet au der Wintersport-
Tourismus grad dermit.

E wytere Noodail kunnt ys au
firs Abfahrtsteam in Sinn,
well denn der Schnee
scho gschmolze isch
bevor die dunde sin.

D Muulwürf/Comité 2000

Mehr über die unendlich vielen anderen Schnitzelbänggler erfahren Sie entweder als Zuhörerin oder Zuschauer in einer der vielen Beizen mit Schnitzelbank-Besuchen, am Fernsehen oder in den kommenden bz-Berichten über d Schlusseebe.