n der Häfelischuel hänn sich der glaini Pierrot und syni Gspänli scho syt Wuche und Monet uff dr Kinderzyschtig vorberaitet. D Kindergärtnere Rebecca isch nämmlig sälber aagfrässeni Fasnächtlere, und so isch fir si sunneglar gsi, ass die glaine Maitli und Buebe mit ihre zämme uff d Gass gehn. Aber als wäär oder was? Wo d Rebeccca e kurligi
Gspängschter-Gschicht verzellt het, won emool an dr Fasnacht bassiert isch, sinn grad alli Fyr und Flamme gsi: Hejo, mir gehn doch am Zyschtig nohmidaag alli als Gspängschter!
Em Pierrot sy Mamme het komisch uus dr Wesch gluegt, won er im Herbscht am ene scheene Daag haim koo isch und gfrogt het, eb si ihm en alt Lyntuech, oder am beschte grad zwai, haig. Er het si bikoo, au wenn s dr Mamme meh als gspässig vorkoo isch. In dr Häfelischuel denn hänn si ganz flyssig uus Kartonschachtle Larve gmacht, si wyss grundiert und laggiert, und uus de Lyntiecher Gspängschter-Hemmli gschnyderet.
Ferchterlig gsehn si jetz uus, die Häfelischuel-Gspängschter, wo si uff ere ganze Zottlede Laiterwäägeli sitze und die Freyi Strooss durabb kemme. Si wärfe kilowys wyssi Räppli, und ass s Motto luutet «Kai Blatt vor s Muul!», findet dr Pierrot bim Intrigiere mega cool…