Der Voordraab ziet der Gummiduume ab em Doope.

Die ainte gamfere d Goschdym uff em Eschtrig yy;

die andere wische d Räppli ab em Wäärtigs-Tschoope.

Ganz langsam wacht men uff und merggt: Es isch verbyy.

Was blybt is iibrig nooch em glaine Seeleschmätter?

Ganz aifach noonemool e riisegroosse Dangg

fir d Faarbe-Bracht, wo gstraalt het bi däm feyne Wätter,

fir Drummle, Pfyffe, Muusig, Väärs und jeede Bangg.

Mer hänn drey wunderscheeni Dääg deerfen erlääbe

und s Festival vo Pointe, Witz und Liebi gfyyrt.

Und wie dr Faasnachts-Virus allewyl blybt glääbe

hesch aimol mee uff hundertdausig Aarte gspyyrt.

Mer danggen seer fir s Oordne, Butze, Hälfe, Rette

dr Bolizey, im Dramm, im Baudepartemänt,

de Fyyrweerlyt, dr Sanideet, und de Kadette.

Mer druggen iine alle zämme alli Händ.

Jetz haissts: D Scharaadekischte fir e Joor verrammle

und hindenumme, ganz versteggt, wie ee und jee

beraits scho wider afo gueti Sujets sammle…

Mer fraien is uff s näggscht Joor,

s Fasnachts-Comité

Weitere Informationen:

Homepage Fasnachts-Comité

Foto-Galerie Fasnacht 2004