Dr achtjährig Dammbuur Kevin, wo am Morgestraich wäge sym ygipste Bai het
miesse mit Stegg am Stroosserand stoh und syne Glyggekolleege zueluege, isch
derby ganz ordeli mied worde. Und so isch er froh gsi, won er dehaim sy
Schaichen e bitz het kenne hochlagere. Aber nit lang ­ schliesslig het er em
Babbe welle zueluege. Dä het nämmlig fir dr Kevin e ganz en aigetimlig
Gfährt baschtlet, ass er weenigschtens an dr Kinderfasnacht kennt
mitdrummle. Also isch dr Kevin d Käller-Stäägen aabeghumplet und do gseht er
grad no, wie dr Babbe bi syneren Aigekonstruggtion Neegel mit Kepf macht.
Dä presentiert das Kunschtwärgg voller Fraid sym Sohn. Uff e groossen alte
Boscht-Handwaage het er e gmietlige Sässel montiert gha, denn e Halterig fir
d Drummle zimmeret und schliesslig en Art Beggli, wo dr Kevin sy verletzt
Bai het kenne biquäm platziere.

Am Nohmidaag ziehn denn dr Babbe, d Mammen und em Kevin sy Schweschter mit
däm Waage in d Stadt ­ dr glai Dammbuur sälbverständlig ganz stolz oobe
druff im Sässel. Unden am Spalebärg warten em Kevin syni beschte Glyggefrind
­ drey Pfyffer und zwai Dammbuure. Wo dr Kevin kerzegrad do sitzt und dr
«Ryslaifer» so guet wie iberhaupt no nie drummlet, fyhlt er sich wie dr
Tutanchamun uff sym Thron. Eb dä au drummlet het, isch em derby aigetlig
ganz wurscht.

Weitere Informationen:

bz-Berichterstattung
Fasnacht 2005