S isch unnemietig, jo gruusig nass-
kalt. Grad het’s wider e baar Minuute gschittet, und dr Pierrot, bis
uff d Huut pflätternass, suecht im Gryzgang vom Minschter e bitzeli
Schärme – und gwis au Schutz. Schutz villicht vor de Gfyhl, wo no all
dääne Ydrigg vo de letschte drey Dääg iber en kemme. Do sitzt er jetz
wien e Hyffeli Eländ, d Drääne kan er numme mit letschter Mieh und Not
zruggheebe. Dä arm Dropf, dänggt gwis au das wunderheerlig Mäsggli, won
en gseht und ganz lys und schych frogt, eb s e bitz derf zuen em sitze.
S Mäsggli wartet scho gar nit uff en Antwort und kuuschelet sich aifach
ganz fescht an en. Äng umschlunge foot das härzig Päärli aa draume: In
dichti Nääbelschwaade ghillt ruesse vier schneewyssi-glitzrige Pierrot
dr Ändstraich – als Gruess an dr 26. Hornig 2007.