Faasnachtsdangg 2006

E soon e Wuche gits woorschyynlig noonig

in unserer ganze Baasler Faasnachts-Chroonik!

Wenn hets emol scho dääwääg gschneit?

Ganz Baasel isch im diefe Schnee versoffe,

und ainewääg isch d Faasnacht brächtig gloffe

s isch iberhaupt nyt abverheit.

Drum het fir s Schuufle, Fääge, Wische, Kippe,

im Martin Bischofbärger sy Equipe

e riisegroosses Danggscheen z guet.

Mer zien vor dääne hundertfache ,

wo yynegneit sinn rund um alli Uure

voll Danggbarkait dr Sunntigshuet.

Au d Bolizey und d Fyyrweer – wie mer wisse –

hänn, wie me sait, sich alli Bai uusgrisse.

Nooch em Zivyylschutz het me gschiggt.

Grad raaiewyys beduurenswäärti Wääse

hänn d Sanideetler daas Joor zämmeglääse

und feyn im Spittel zämmegfliggt.

Eych alle zämme wämmer hit e satte

und bsunders liebe Faasnachtsdangg abstatte!

Me hofft, s gäb s näggscht Joor ooni Schnee

e Faasnacht in dr ganz normaalen Oornig,

und frait sich uff dr säggsezwanzigscht Hoornig!

Ganz häärzlig,

s Fasnachts-Comité