Dr Groossbabben hets Chiara wider uff Bsuesch, wo s letscht Johr als noonig ganz dreijährige Gnirps s erscht Mool het derfen an Morgestraich. Die Glai isch sälbetsmool vom Ruessen und Pfyffe esoo begaischteret gsi (Kunschtstigg, bi däm Groossbabbe…), ass si dismool scho am Sunntig zoobe wien e Wischbel ummedänzlet isch. Dr Groossbabben aber isch allem Aaschyn aa no vyl närvooser gsi. Er het dr Wegger in der Kuchi, dä im Schloofzimmer und au dä im Handy (doch, doch au är het ains…) uff Viertel vor Drey gstellt, ass si denn jo nit z spoot in d Stadt kääme. Doch scho am halber Drey isch d Chiara ynedyselet, het dr Groossbabbe mit syne fyne Händli gstrichelet und gflischteret: «Morgestraich, vorwärts, marsch!»…