Dr Zyschtig isch jo, wie me waiss, au en aigetlige Familiedaag. Ai Glygge – s git gwis no mänggi anderi, wo das au macht – pflägt ganz speziell s Familielääbe. Und jetz heeb Di, das isch uusgrächnet aini vo däne ganz weenige Männerglyyge, wo s no git: 
d Olympia. Ass si vo Fraue nyt wisse wänn, isch z mindescht am Fasnachts-Zyschtig en Ammemäärli. Die Manne wissen nämmlig no, was sich gheert und was si ihre Fraue, jo dr ganze Familie schuldig sinn.

E Muschterbispyl do derfir isch dr wunderheerlig Hiehnerstall, won is uff em Seibi bigeegnet. Voruus uusgwachseni gold-gääli Henne, wo dr Stall ziehn. Dä isch scheen gschmiggt mit Aierschachtle und Hai, und im Hai gaggere gäggeligääli Bybbeli. Hyndedry schliesslig stolziere fimf Giggel mit ihre Messing-Hääfe. Und das sinn ebbe fimf Dambuure vo de Olymper, d Hiehner ihri Frau und d Bybbeli ihri Kinder. Fir dä olympisch-, pardon Familiegaischt hänn si ganz gwis e bsunderi Medaille verdient.