Es ist eine schöne Tradition: Immer am Donnerstag nach den «drey scheenschte Dääg» meldet sich das Fasnachts-Comité mit dem Fasnachtsdank zu Wort.

Faasnachtsdangg 2009

S isch wider Zyt zem häärzlig dangge,

vor allem zeerscht emol de Bangge

und alle andere Variante

vo guete Sujet-Liferante.

Bängg, Glygge, Wääge, Ziigli, Gugge,

hänn dyttlig zaigt, was is duet drugge.

Fir Pointe, Witz und s Persifliere

deerf me drum alle grateliere.

Dr Dangg gilt au de guete Gaischter

und Faasnachts-Service-Public-Laischter:

De Schuugger und Allmändverwalter

und däänen am Eleggtrisch-Schalter,

de Stroossebutzer und Kadette,

au alle, wo als mien go rette,

und no vyyl mee, wo ganz im Stille

so oordlig iire Dienscht erfille.

Wie jeedesmool am Donnschtig-Moorge

Wämmer jetz alles scheen versoorge,

d Scharaadekischte guet verrammle,

ganz flyssig afo Sujets sammle

und scho fir s näggscht Joor afo iebe.

Zwaidausig-Zää isch glyy, Iir Liebe

Am Zwaiezwanzigschte im Hoornig

isch z Baasel wider rächti Oornig!

Fasnachts-Comité