Es isch emool in de friehje Dryssger Johr e Kibel uus Glaihyniger Gold gsi. Dä, wo ze sällere Zyt uff däm heerligen Inschtrumänt het derfe drummle, het das aber nummen an Turnfescht und andere Feschtaaläss kenne. Er isch nämmlig Mitgliid in ere Glygge gsi, wo vo katholische Männer grindet worden isch. Und Katholigge hänn friehjer nohn em Äschemittwuche nimm Faasnacht gmacht (das het zem Gligg speeter gänderet).

Nohn em Zwaite Wältgrieg isch die Messing-Drummle denn e baar Johrzähnt bi däm Dammbuur dehaim ungnutzt uff em Schloofzimmer-Kaschte gstande.
Ain vo de zwai Sehn, wo d Drummelkunscht speeter au glehrt hänn, het denn vor ebbe 20 Johr dä Kibel wider vom Kaschte obenaabe gholt, zem ene biriehmte Drummelbauer brocht und en vo ihm instandstelle loo. Glar, sinn fir das Inschtrumänt, wo ibrigens in däne vyle Johr e sältebrächtigi Patina bikoo het, numme zwai erschtglassigi Kalbfäll in Froog koo. D Saili und d Strupfe sinn ersetzt worde, und fachmännisch gschränggt isch schliesslig uus däre Drummlen e wunderheerlig «Gleggli» worde.

Vo dr Dammbuure-Grubbe, wo die baide Brieder gruesst hänn, het e jeeden emool mit em reschtaurierte Messing-Haafe derfen e Rundi draie. Derby hänn wohrschynts alli under dr Larve e baar Fraide-Dräänli verdruggt. Kurz noh sällere Faasnacht het dr aint Sohn uus gsundhaitlige Grind s Ruesse
miessen an Naagel hängge, und au dr ander het d Schleegel bald in der Schublaade versorgt. Esoo isch die Drummle halt wider fir langi Zyt uff dr Schloofzimmer-Kaschte koo.

Will aber d Witwe vom Dammbuure-Babbe kirzlig gstorben isch, isch s Schiggsaal vo däre wärtvolle Drummle uff aimool wider offe. Si wartet jetz druff, ass sich e «Drummelhund» fir si intressiert, si wott kaufe und denn an dr Faasnacht maischterhaft d Wirbel uff em Kalbfäll grällele losst. Und jetz nimmt Si villicht wunder, eb das nummen e Märli oder emänd doch wohr isch? Frooge Si doch aifach dr bz-Faasnachts-Redaggter…