Vor de Dreie us der Glappe.

Gschwind e Kaffi wil me friert.

und e Cognac fir de Bappe!

Mach jetzt, dass men abmarschiert.

Iibernächtigt bisch und blaich.

Äntlig wider Moorgestraich!

Stohsch im Gässli, ääneduure

gsehsch dur d Nacht d’ Ladäärne koo

Naime iebt e Waggis Schnuure;

alles streggt der Hals dernoo,

ob er au die Rächte braicht.

Äntlig wider Moorgestraich!

Und de heersch si pfyffe, drummle,

dass s aim bis in d Zeeche frait.

Jetzt muesch druggen und di dummle,

sunscht verfählsch die Heerligkait.

Griegsch au Biff und Dritt und Spaich,

Äntlig wider Moorgestraich!

s bruucht e freschtlig Moorgeliftli,

bis i langsam haimzue stampf.

Us de Baize strycht e Diftli,

Larvelagg und Suppedampf.

s Häärz isch gligglig, d Gnei sinn waich…

Äntlig wider Moorgestraich!

(Blasius)