Aus dem Büchergestell gefischt (IIb):

Drittens haltet (s isch zem briele!)

s Häsli d Rendezvous nimm y:

«s duett mr laid, y muess hitt zobe

Zytig bi dr Schnydere sy.

Was y miech? s blybt ghaim – doch wichtig

Isch, ass si joo s Määs guet braich!»

Hm – au das sinn Fasnachtszaiche –

s Härz wird aim fascht sähnsuchtswaich. . .

Viertens kunnt d Scharadekischte

Aim dr ganz Dag glatt in Wäg:

s isch, wie wenn si Fiess bikoo hätt

Juscht fir die Vorfasnachtsdäg!

Lipft me kuum dr Deggel uff, so

Gyxe froh d Scharnier im Glaich:

Alti Goschtym! Fasnachtszaiche –

s Härz wird aim fascht sähnsuchtswaich. . .

«Vorfasnacht» (2/3) von Rudolph Bolo Maeglin (1898-1973) aus
«Unvergessene Basler Dichter 3», GS-Verlag.